Մարդու իրավունքների պաշտպանին առընթեր Երեխաների իրավունքների պաշտպանության հարցերով հասարակական խորհուրդը ձևավորվել է 2024 թվականին՝ Պաշտպանի որոշմամբ։

Խորհրդի նպատակը երեխաների իրավունքների պաշտպանության ոլորտում Պաշտպանի գործունեությանն աջակցելն է՝ որպես խորհրդատվական մարմին: Խորհրդի անդամները հնարավորություն են ունենում Պաշտպանին ներկայացնել իրենց հուզող հարցերն ու խնդիրները, դիտարկումներն ու առաջարկները, երեխաների ձայնը լսելի դարձնել ներպետական և միջազգային հարթակներում:

Խորհուրդը ձևավորվում է Հայաստանի Հանրապետության տարբեր մարզերը և բնակավայրերը ներկայացնող և տարբեր տարիքային խմբերի երեխաներից։ Խորհրդի կազմում ընդգրկվում են երեխաներ, որոնք հետաքրքրված են երեխաների իրավունքների պաշտպանությամբ, պատրաստ են բարձրաձայնել երեխաներին հուզող խնդիրները և մասնակցել դրանց լուծմանն ուղղված քննարկումներին։

Պաշտպանին առընթեր Խորհրդում քննարկման առարկա են հանդիսանում՝

• երեխաների իրավունքների պաշտպանության ոլորտի վերաբերյալ խնդիրները և դրանց լուծման հնարավորությունները,

• կրթության, առողջապահության, սոցիալական պաշտպանության, առցանց անվտանգության ոլորտներում երեխաներին առնչվող հարցերը,

• երեխաների նկատմամբ բռնության կանխարգելմանն ուղղված միջոցառումները,

• երեխաների՝ ներպետական և միջազգային հարթակներում իրականացվող քննարկումներին, միջոցառումներին և նախաձեռնություններին մասնակցության խթանումը,

• ինչպես նաև երեխաների իրավունքների պաշտպանության ոլորտում կարևորություն ունեցող այլ հարցեր։

Խորհուրդը նպաստում է երեխաների ձայնը լսելի դարձնելուն, նրանց մասնակցության խթանմանը և երեխաների լավագույն շահի ապահովմանն ուղղված նախաձեռնությունների զարգացմանը: