Քաղաքացիական հասարակության հետ համագործակցությունը հատկապես վառ ընդգծվում է Մարդու իրավունքների պաշտպանին առընթեր կանանց իրավունքների հարցերով հասարակական խորհրդի գործունեության միջոցով:

Խորհուրդը ձևավորվել է Պաշտպանի որոշմամբ՝  2022 թվականի օգոստոսի 25-ին։

Խորհուրդն իր գործունեությունը ծավալում է կանանց իրավազորման, տնտեսական հզորացման, իրավահավասարության ապահովման, քաղաքական մասնակցության ակտիվացման, կանանց նկատմամբ բռնության և գենդերային բռնության կանխարգելման, դրանց արձանագրման և աջակցության տրամադրման, իրավապահ համակարգում և զինված ուժերում կանանց ակտիվ ներգրավման ու առաջընթացի ոլորտներում, կանանց իրավունքներին առնչվող ռազմավարական ու կրթական ուղղություններում։

Խորհուրդը ձևավորվում է կանանց իրավունքների պաշտպանության բնագավառում հասարակական փորձ ունեցող ներկայացուցիչներից և անկախ մասնագետներից:

Խորհուրդը բաղկացած է 17 անդամից՝ այդ թվում 16 հասարակական կազմակերպության ներկայացուցչից և մեկ անհատ փորձագետ-փաստաբանից։

Խորհրդի կազմում անհատ փորձագետ-անդամի ընտրության ժամանակ նախապատվությունը տրվում է կանանց իրավունքների պաշտպանության ոլորտում իրավաբանի, բժշկի, հոգեբանի, սոցիալական աշխատողի, սոցիոլոգի մասնագիտություն և համապատասխան աշխատանքային փորձ ունեցող անձանց:

Խորհրդի նպատակը կանանց իրավունքների պաշտպանության ոլորտում Պաշտպանի գործունեությանն աջակցելն է՝ որպես խորհրդատվական մարմին:

Խորհրդի խնդիրներն են՝

• աջակցել Պաշտպանին կանանց իրավազորման, տնտեսական հզորացման, իրավահավասարության ապահովման, քաղաքական մասնակցության ակտիվացման, կանանց նկատմամբ բռնության և գենդերային հիմքով բռնության կանխարգելման, դրանց արձանագրման և աջակցության տրամադրման աշխատանքներում,

• խթանել իրավապահ համակարգում և զինված ուժերում կանանց ակտիվ ներգրավմանն ու առաջընթացին,

• աջակցել Պաշտպանին ոլորտի զարգացման համար կառավարության կողմից հաստատված ռազմավարությունների ու ծրագրերի իրականացման մշտադիտարկում և կատարողականի գնահատում իրականացնելու հարցերում,

• նպաստել կանանց իրավունքների պաշտպանության արդյունավետության բարձրացմանն ուղղված հետազոտությունների, ուսումնասիրությունների կամ վերլուծությունների իրականացմանը, համակարգային խնդիրների վերհանմանը և դրանց հիման վրա Պաշտպանին առաջարկներ ներկայացնելուն,

• իրականացնել կանանց ու աղջիկների իրավունքների մասին իրազեկման արշավներ, կրթական ու մասնագիտական վերապատրաստման ծրագրեր,

• ուսումնասիրել և քննարկել կանանց իրավունքների պաշտպանության վերաբերյալ ինչպես տեղական հասարակական կազմակերպությունների, այնպես էլ միջազգային կազմակերպությունների զեկույցները կամ հաշվետվությունները, միջազգային և եվրոպական կառույցներում բարձրացված խնդիրները և ոլորտին առնչվող այլ հարցեր։

Խորհրդի նիստերը հրավիրվում են առնվազն վեց ամիսը մեկ անգամ, որոնք վարում է Պաշտպանը: Ըստ անհրաժեշտության կարող են հրավիրվել նաև արտահերթ նիստեր՝ Պաշտպանի կամ խորհրդի անդամների մեկ երրորդի նախաձեռնությամբ:

Խորհրդի նիստերին կարող են հրավիրվել համապատասխան պետական և տեղական ինքնակառավարման մարմինների ներկայացուցիչներ ու պաշտոնատար անձինք, Խորհրդի անդամ չհանդիսացող այլ հասարակական կազմակերպություններ և փորձագետներ, միջազգային կազմակերպությունների ներկայացուցիչներ, հանրային գործիչներ և այլ շահագրգիռ անձինք: